第一次扮買家試車

星期日路過MegaBox，順便行過對面VW睇車，其實係想睇吓架Polo GTI同埋7代Golf，睇睇吓就有個Sales走埋來，又例牌同我Sales talking啦，同佢吹吹吓又俾佢氹咗出停車場睇架出咗牌嘅Golf Confortline喎，仲俾佢氹咗上司機位添，好啦，都係十五分鐘啫，咪試吓囉。

第一個感覺係，俾好多電子嘢包圍住，又電子手掣，唔帶安全帶又開唔到車，電子乜乜，電子物物，總之就唔俾人做錯嘢，即係好安全啦。好啦，準備開車，個Sales話一踩油個電子手掣識得放喎，點解唔得嘅，舞咗一輪，我都講咗句：「唔係有bug吓嘩」。手動放手掣，開車，個軑盤好輕，輕過好多日本車，輕踏油門，架車唔去，要踏深少少至識去，感覺輕柔似傳統自動波，並無傳說中極力子自動波果種跑馬仔，值得一贊。水撥位同指揮燈跟日本車相反，不過同我架Echo一樣，所以對我完全無問題。水撥係雨滴感應（又係電子嘢）！上觀塘妖道，一路都係好細力掂住油門，但係架車已經好鬼祟咁去到90km/h，超咗速添！結果全程都𥄫實個車速錶，就咁响將軍澳道車返轉頭。

未開車前，都同個Sales講咗咁少時間唔會試到d乜，而暫時嘅結論係，呢架車係可以好輕鬆安全舒服咁將司機同乘客由A地點車到去B地點，不過剌激欠奉，唔好玩。